နိုင်ငံတကာနှင့် ပြည်တွင်းသတင်း၊ နည်းပညာ၊ ဆော့ဝဲလ်နှင့် ဗဟုသုတများ

အားပေးကြတဲ့မိတ်ဆွေများ

Saturday, April 25, 2015

စစ်ဘေးရှောင် ဒုက္ခသည်များ ကူညီ စောင့်ရှောက်ရေး အဖွဲ့ ဖွဲ့စည်း




စစ်တွေ၊ ဧပြီ ၂၄

မြန်မာ့ တပ်မတော်နှင့် ရခိုင့် တပ်မတော် အကြား တိုက်ပွဲ ဖြစ်ပွား ရာမှ ဒုက္ခရောက် နေသော စစ်ဘေး ဒုက္ခသည် များကို ကူညီရန် စစ်ဘေး ဒုက္ခသည်များ ကူညီ စောင့်ရှောက်ရေး ကော်မတီ (ယာယီ) ကို စစ်တွေ မြို့ပေါ်ရှိ ရခိုင် လူမှု အဖွဲ့ အစည်းများ စုပေါင်း၍ ဖွဲ့စည်း လိုက်ကြောင်း သိရသည်။

ယင်း ယာယီ ကော်မတီကို ဧပြီလ ၂၄ ရက်နေ့က အဖွဲ့ဝင် ၂၅ ဦးဖြင့် ဖွဲ့စည်း လိုက်ကြောင်း သိရသည်။

စစ်တွေမြို့ပေါ်ရှိ ရခိုင် လူမှု အဖွဲ့အစည်း ၂၀ ကျော်က ၈၈ မျိုးဆက်များ လူမှုဖွံ့ဖြိုးရေး အဖွဲ့ ရုံးတွင် ဧပြီလ ၂၃ ရက်နေ့ ညနေနှင့် ဧပြီလ ၂၄ ရက်နေ့ နံနက်က အစည်း အဝေး နှစ်ကြိမ် ပြုလုပ်ပြီး အဆိုပါ ကော်မတီကို ဖွဲ့စည်း လိုက်ခြင်း ဖြစ်သည်။

ကူညီရေးလုပ်ငန်းများကို စနစ်တကျဆောင်ရွက်နိုင်စေရန် ယင်းကော်မတီထဲတွင် ဘဏ္ဍာငွေကောက်ခံရေး၊ ဘဏ္ဍာငွေထိန်းသိမ်းရေး၊ အကူအညီပေးရေး၊ အစိုးရအာဏာပိုင်များနှင့်တွေ့ဆုံရေး ဆပ်ကော်မတီများကို ဖွဲ့စည်းထားကြောင်း သိရသည်။

ယင်းစစ်ဘေးဒုက္ခသည်များ ကူညီစောင့်ရေးကော်မတီသည် ရခိုင်ပြည်နယ် ကျောက်တော်မြို့နယ်တွင် တိုက်ပွဲကြောင့် ဒုက္ခရောက်နေသူများကို ကူညီဖို့ခွင့်ပြုချက်ရယူရန် ရခိုင်ပြည်နယ်အစိုးရအဖွဲ့နှင့် တွေ့ဆုံသွားမည်ဟုလည်း သိရသည်။

ဒုက္ခသည်များအတွက် လတ်တလော အရေးတကြီးလိုအပ်နေသော အိမ်သာ၊ အမိုးအကာ၊ ဆေးဝါးနှင့် စားနပ်ရိက္ခာများကို ကူညီပေးသွားမည်ဟု သိရသည်။

ဒုက္ခသည်များ ကူညီစောင့်ရှောက်ရေးကော်မတီသည် စစ်ဘေးဒုက္ခသည်များအပြင် ရခိုင့်တပ်မတော်နှင့် ဆက်စပ်မှုရှိသည်ဟု မသင်ကာ၍ ဖမ်းဆီးခံရသူများ၏ ကျန်ရစ်သူမိသားစုများကို ကူညီနိုင်ရန် စီစဉ်ပေးသွားမည်ဟု ယင်းအစည်းအဝေးဆုံးဖြတ်ချက်များအရ သိရသည်။

ယခုအခါ တိုက်ပွဲကြောင့် ဒုက္ခရောက်နေသူ ၄၀၇ ဦးရှိနေပြီး ကျောက်တော်မြို့မှ အဖွဲ့တစ်ဖွဲ့သည် မနက်ဖြန် ဧပြီလ ၂၅ ရက်နေ့ နံနက် ၈ နာရီတွင် စပါးဆိပ်ကျေးရွာသို့ သွားရောက်ကူညီမည်ဖြစ်ကြောင်း သိရသည်။

စစ်ဘေးဒုက္ခသည်များကို ကူညီနိုင်ရန် မြောက်ဦးမြို့တွင်လည်း အဖွဲ့ဝင် ၃၀ ကျော်ပါ အရေးပေါ်ကယ်ဆယ်ရေး ကော်မတီတစ်ရပ်ကို ဖွဲ့စည်းထားပြီး၊ ကော်မတီ ခေါင်းဆောင်များရွေးချယ်ရန် အစည်းအဝေးလုပ်နေကြကြောင်း မြောက်ဦးမြို့ သွေးလှူရှင်အသင်းဒုဥက္ကဌ ဦးမောင်သောင်းရွှေပြောပြချက်အရ သိရသည်။

စံမောင်သန်း / နိရဉ္စရာ
http://www.narinjara.com/burmese/?p=14152

No comments:

smy909@gmail.com