နိုင်ငံတကာနှင့် ပြည်တွင်းသတင်း၊ နည်းပညာ၊ ဆော့ဝဲလ်နှင့် ဗဟုသုတများ

အားပေးကြတဲ့မိတ်ဆွေများ

Tuesday, September 06, 2016

မျက်နှာကို အက်ဆစ်ဖြင့် ပက်ခံရသော်လည်း အရှုံးမပေးဘဲ မိတ်ကပ် ပညာရှင် ဖြစ်လာသူ




ရက်ရ်ှမာ ကွာရှီဟာ လွန်ခဲ့တဲ့ ၂ နှစ်လောက်က အက်ဆစ်နဲ့ ပက်ပြီး တိုက်ခိုက် ခံခဲ့ရလို့ မျက်နှာ ပျက်စီး ခဲ့ရပေမယ့် ဘ၀ကို အရှုံး မပေးခဲ့ဘဲ လက်ရှိမှာတော့ မိတ်ကပ် ပညာရှင် တဦး ဖြစ်လာ ခဲ့ပါတယ်။

သူဟာ အက်ဆစ်ရောင်းချခြင်းကို ဆန့်ကျင်တဲ့ လှုပ်ရှားမှုတွေမှာ လှုံ့ဆော်သူတဦးအဖြစ် ပါဝင်နေပြီး အလှအပဆိုင်ရာ အကြံပြုချက် ရုပ်သံဗွီဒီယိုဖိုင်တွေကို မျှဝေနေ ခဲ့တာပါ။

ရက်ရ်ှမာ ကွာရှီဟာ ၂၀၁၄ ခုနှစ်မှာ ခဲအိုဖြစ်သူက မျက်နှာကို အက်ဆစ်နဲ့ပက်ပြီး တိုက်ခိုက်ခံခဲ့ရာကနေ အသက်မသေဘဲ လွတ်မြောက်လာခဲ့သူပါ။

“ကျမရဲ့ခဲအိုဟာ ကျမအစ်မကို အမျိုးမျိုးနှိပ်စက်ခဲ့တဲ့အပြင် ကျမမျက်နှာကိုလည်း အက်ဆစ်နဲ့ပက်ခဲ့တာပါ။ အစ်မရဲ့လက်ကိုလည်း အက်ဆစ်နဲ့ ပက်ခဲ့ပါတယ်။ အဲဒီနေ့က ကျမတို့ဘေးမှာ လူတွေ ၀ိုင်းနေခဲ့ကြပေမယ့် ဘယ်သူကမှ မကူညီနိုင်ခဲ့ကြပါဘူး” လို့ ပြောပါတယ်။

သူ့ရဲ့ဘ၀ဟာ အဲဒီနောက်မှာတော့ လုံးဝကို ပြောင်းလဲသွားခဲ့တယ်လို့ ဆိုပါတယ်။

“ကျမ ခွဲစိတ်မှုတွေ လုပ်ပြီးခဲ့တဲ့အချိန်မှာ ကျမရဲ့မျက်နှာကို ပြန်ကြည့်လိုက်တော့ ဒါဟာ ကျမပါဆိုတာကို ဘယ်လိုမှ မယုံနိုင်ခဲ့ပါဘူး။ ကျမမိသားစုဝင်တွေကို ကျမ ကိုယ့်ကိုယ်ကိုယ် သတ်သေမယ်လို့ ပြောခဲ့တယ်။ လူတိုင်းက အသက်ရှင်နေထိုင်နိုင်ခြင်းကို နားလည်နိုင်ဖို့ ကျမကို ကူညီပေးခဲ့ကြပါတယ်။”

ရက်ရ်ှမာဟာ အဲဒီနောက်မှာတော့ “အပြစ်အနာအဆာမပါဘဲ ချစ်ခြင်းမေတ္တာကို ဖန်တီးပါ” လို့ အမည်ရတဲ့ ပရဟိတလုပ်ငန်းတွေမှာ ပါဝင်လှုပ်ရှားခဲ့ပါတယ်။

သူဟာ အက်ဆစ်နဲ့တိုက်ခိုက်ခံရတဲ့ ခုလိုအဖြစ်တွေရဲ့ တခုတည်းသော ပြယုဂ်တခု ဖြစ်လာခဲ့ပါပြီ။

နှစ်သိမ့်ဆွေးနွေး ပညာပေးမှုတွေဟာ သူအသက်ရှင်နေထိုင်ရမယ်ဆိုတဲ့ အစွမ်းသတ္တိနဲ့ ပြန်လည်ရှင်သန်ခွင့်အတွက် မကူညီနိုင်ခဲ့ဘူးလို့ ရက်ရ်ှမာက ပြောပါတယ်။

ခုချိန်မှာတော့ သူမဟာ အိန္ဒိယနိုင်ငံမှာ အက်ဆစ်ကို လွတ်လွတ်လပ်လပ် ရောင်းချခွင့် ရပ်တန့်နိုင်ဖို့ လှုံ့ဆော်ရေးလုပ်ငန်းတွေမှာ ပါဝင်နေပါတယ်။

အက်ဆစ်ရောင်းချမှုကို ၂၀၁၃ ခုနှစ်မှာ အိန္ဒိယဗဟိုတရားရုံးက တားမြစ်ခဲ့ပေမယ့် လျစ်လျူရှုခဲ့ကြပြီး ရူပီးအနည်းငယ်လောက်ရှိရုံနဲ့ နေရာအနှံ့ အက်ဆစ်တွေကို အလွယ်တကူ ၀ယ်လို့ရနေတယ်လို့ ရက်ရ်ှမာက ပြောပါတယ်။

ခုချိန်မှာတော့ ရက်ရ်ှမာကို အမေရိကန်နိုင်ငံမှာ ကျင်းပမယ့် နယူးယောက်ဖက်ရှင် ရက်သတ္တပတ် အစီအစဉ်မှာ ပါဝင်ဖို့ ဖိတ်ခေါ်ခြင်း ခံခဲ့ရပါပြီ။

ဒါဟာ သူ့ရဲ့ ပထမဆုံး နိုင်ငံတကာ အတွေ့အကြုံတခုဖြစ်ပြီး တခြား ဒဏ်ရာအနာတရတွေ ရပြီးမှ လွတ်မြောက်လာသူတွေအတွက် အားအင်တခု ရစေလိမ့်မယ်လို့ သူမက မျှော်လင့်နေတာပါ။

“ခုလိုဖိတ်ခံရတာဟာ ကျမအတွက် တကယ့်ကို ကြီးကျယ်ခမ်းနားမှုတခုပါပဲ။ လူတွေအများကြီးကို ကျမရဲ့အကြောင်း ပြောခွင့်ရမယ်။ ကျမကိုမြင်ရတဲ့ တခြား နှိပ်စက် ခံရသူတွေလည်း အားအင်တခုခု ရစေပါလိမ့်မယ်။ အလှတရားဆိုတာ ရှင်တို့ရဲ့မျက်နှာနဲ့ ပြင်ပသွင်ပြင်တွေကလာတာ မဟုတ်မှန်း ကျမ သင်ယူခဲ့ရပါတယ်။

တကယ်တော့ ရှင်တို့မှာ ယုံကြည်မှုရှိရင် ရှင်တို့ဟာ လှနေမှာပါပဲ။”



From : ဒီဗွီဘီ

Originally published at - http://burmese.dvb.no/archives/167227

No comments:

smy909@gmail.com