နိုင်ငံတကာနှင့် ပြည်တွင်းသတင်း၊ နည်းပညာ၊ ဆော့ဝဲလ်နှင့် ဗဟုသုတများ

အားပေးကြတဲ့မိတ်ဆွေများ

Thursday, December 29, 2016

ရခိုင်ဒေသ အကူအညီပေးရေးများ တရားဝင် ညှိုနှိုင်းဖို့ မြန်မာ အစိုးရ တိုက်တွန်း


ရခိုင်ဒေသက မွတ်ဆလင်တွေ


မလေးရှား နိုင်ငံ အစ္စလာမ် အဖွဲ့ အစည်း တခုဖြစ်တဲ့ Malaysian Consultative Council of Islam Organizations က မြန်မာနိုင်ငံ ရခိုင်ဒေသက မွတ်ဆလင် တွေကို အကူအညီ ပေးရေး သင်္ဘော ပို့လွှတ်မယ် ဆိုတဲ့ အပေါ်၊ မြန်မာဖက်က ဒါကို တရားဝင် သံတမန်ရေး နည်းလမ်းနဲ့ ဆောင်ရွက်ဖို့ တိုက်တွန်း လိုက်ပါတယ်။

ဒီ အစ္စလာမ်အဖွဲ့ အနေနဲ့ ရခိုင်ပြည်နယ်ကို အကူအညီပေး သင်္ဘောတွေ စေလွှတ်မယ် ဆိုတာကို မလေးရှား ပြည်တွင်း သတင်းတွေမှာ ဖော်ပြ ခဲ့တာပါ။

သူတို့အနေနဲ့ အတင်းအကျပ်ပိတ်ဆို့ခံရတာမျိုး၊ သင်္ဘောပြန်လှည့်ခိုင်းတာမျိုးတွေပါ ကြုံရနိုင်တယ်လို့ အဲဒီ အဖွဲ့တာဝန်ရှိ သူက မလေးရှား သတင်းမီဒီယာတွေကို ဖြေထားပါတယ်။

ဒီအပေါ် ဘယ်လို တုန့်ပြန်မလဲဆိုတာကိုတော့ မြန်မာသမ္မတရုံး ၀န်ကြီးဌာန ပြောခွင့်ရသူ ဦးဇော်ဌေးကို ကိုသားညွန့်ဦး ဆက်သွယ် မေးမြန်း ထားပါတယ်။

ကိုသားညွှန့်ဦး ။ ။ မလေးရှားနိုင်ငံက flotilla ဆိုတဲ့အဖွဲ့က ရခိုင်ဒေသကို အစားအသောက်ထောက်ပံ့တွေ ပို့တဲ့ သဘောင်္တွေ လွှတ်မယ်လို့ပြောတယ်။ အဲဒါမြန်မာနိုင်ငံကိုရော အကြောင်းကြားတာရှိလား၊ ဆက်သွယ်တာမျိုးရော ရှိပါသလား။

ဦးဇော်ဌေး။ ။ မရှိဘူးခင်ဗျ၊ ကျနော်တို့လည်း မလေးရှား အွန်လိုင်းသတင်းတွေ အရ ကျနော်တို့လည်း သိရတယ်။ ပြီးခဲ့တဲ့ အချိန်တုန်းက အာဆီယံနိုင်ငံခြားရေး ၀န်ကြီးတွေကို
နိုင်ငံတော် အတိုင်ပင်ခံ ပုဂ္ဂိုလ် ရှင်းတာရှိတယ်။ ရခိုင်မောင်တော အခြေအနေ ရှင်းပြတယ်၊ အဲဒီမှာ ဒီအစိုးရရဲ့ တွေ့ကြုံနေရတဲ့ အခြေအနေကို အာဆီယံက နားလည်တယ်။

အချိ်န်ယူရမယ် ဆိုတာ လက်ခံတယ်၊ တဆက်တည်းမှာပဲ ကျနော်တို့က လူသားချင်း စာနာထောက်ထားမှု အကူအညီ အနေနဲ့ အာဆီယံ အနေနဲ့ ပေးအပ်လိုရင် ကျနော်တို့ ညှိနှိုင်းဆောင်ရွက် သွားဖို့ ကိုလည်း ဆွေးနွေးတယ်။

အဲဒါနောက်ဆက်တွဲအနေနဲ့ အင်ဒိုနီးရှားနိုင်ငံက Indo Aid ဆိုတဲ့အဖွဲ့အစည်းက NGO တခုပေါ့နော်။ သူကနေပြီးတော့ လူသားချင်းစာနာထောက်ထားမှု အကူအညီတွေပေးဖို့ တင်ပြလာတော့ ကျနော်တို့က ပြည်နယ်အစိုးရနဲ့ ညှိနှိုင်းပြီးတော့ အဲဒါတွေ ဖြန့်ဝေတဲ့ အထိ ဆောင်ရွက်ပြီးသွားပြီ။

အခုကိစ္စကတော့ ကျနော်တို့ အစိုးရကို တရားဝင် တင်ပြခြင်း၊ ခွင့်ပြုချက်တောင်းခံခြင်းမရှိဘူး။ မရှိတော့ ဒီကနေ့ပဲ မြန်မာနိုင်ငံ နိုင်ငံခြားရေးဝန်ကြီးဌာနကနေပြီးတော့ ဒီမှာရှိတဲ့ မလေးရှားသံအမတ်ကြီးကိုပြောထားတယ်။ ကျနော်သတင်းတွေကတော့ တွေ့ပြီ တရားဝင်တော့ ဘာမှ တင်ပြတာတွေတော့မရှိဘူး။ မရှိတော့ တရားဝင်လမ်းကြောင်း ကနေ တင်ပြပါ၊ ဆိုတာကို ကျနေ်ာ်တို့ မလေးရှားသံရုံးကို ပြောထားပြီးဖြစ်တယ်။

ကိုသားညွှန့်ဦး ။ ။သူတို့ဘက်က ပြောရေးဆိုခွင့် ရှိသူ ထင်ပါတယ် အတွင်းရေးမှူးချူပ် ဆိုပြီးတော့ သူတို့ သတင်းထဲမှာ ရေးတာက သူတို့ကို တားဆီးနိုင် တာတွေ ရှိတယ်။
ပြန်ပြီးတော့ တုံ့ပြန်နိုင် တာတွေ ရှိတယ်။ ဆိုလိုတဲ့ သဘောကတော့ သူတို့မရ ရအောင် ၀င်မယ်ဆိုတဲ့ သဘော သဏ္ဍာန်ဆောင် နေပါတယ်။ ဂါဇာလို ဟာမျိုးနဲ့ နှိုင်းယှဉ် ပြီးတော့ ပြောတာ ဆိုတာတွေရှိတော့


ဦးဇော်ဌေး။ ။ ဒီအဖွဲ့ပေါ့နော် နံပတ်၁ မေးခွန်းက သူတို့သည် ကျနေ်ာတို့ လူသားချင်း စာနာ ထောက်ထားမှု အကူအညီတွေကို ဒီဒေသမှာ ရှိတဲ့ လူတွေကို ပေးအပ်ချင်တဲ့ ဆန္ဒရှိတာ ဟုတ်ပါသလား၊ အဲဒီမေးခွန်း အရ အမှန်တကယ် အကူညီတွေ ထောက်ပံ့ဖို့ ရည်ရွယ်ချက်က အဓိကပဲ ဆိုရင်တော့ တရားဝင် လမ်းကြောင်း ကနေပြီးတော့ မြန်မာနိုင်ငံ အစိုးရကို တင်ပြဖို့လိုတယ်။

အဲလိုတင်ပြဖို့ ခက်နေရင်လည်း မလေးရှားသံရုံးကတဆင့်၂ နိုင်ငံအစိုးရတွေကတဆင့် ဆက်သွယ်ပြီးတော့ တင်ပြလို့ရတယ်။ အဲဒီ တင်ပြလာတဲ့ တင်ပြချက် အနေအထား၊ ဒါတွေကို မူတည်ပြီးတော့ မြန်မာနိုင်ငံအစိုးရက စဉ်းစားသုံးသပ် ဆုံးဖြတ်ပေးမှာဖြစ်တယ်။ ကျနော်တို့ ကတော့ ပိတ်ပင်ထားတာ လုံးဝမရှိဘူး။ တံခါး ပိတ်ထားတာ လုံးဝမရှိဘူး။ အားလုံးကို ကျနော်တို့က Open Door ဖွင့်ထားတယ်။

ဒုတိယ နံပတ်၂ အချက် ကတော့ ဒီဟာကို အကြောင်းပြုပြီးတော့ ပြဿနာတွေ ပိုကြီးထွား လာအောင် ဂါဇာကို တူရကီ ၀င်သလိုမျိုး ပြဿနာကို မီးထွန်းရှာတဲ့ ရည်ရွယ်ချက် ဟုတ်မဟုတ် ဆိုတာ သူတို့ကို သူတို့ ပြန်ဆန်းစစ်ဖို့ လိုတယ်။

ပြဿနာ မီးထွန်းရှာဖို့ဆိုတဲ့ ရည်ရွယ်ချက်နဲ့ ဒီလိုမျိုး မိမိသဘောနဲ့ သက်ဆိုင်ရာ နိုင်ငံအစိုးရ ၊ သက်ဆိုင်ရာနိုင်ငံ အချုပ်အခြာအာဏာပေါ့ ၊ ဒါကိုလေးစားလိုက်နာခြင်းမပြုပဲနဲ့ မိမိသဘောနဲ့ မိမိ တိုက်ရိုက်ဝင်ရောက်ပြီးတော့ ဒီလိုဖြန့်ဝေမယ်ဆိုရင်တော့ ပြဿနာ မီးထွန်းရှာဖို့ဆိုတဲ့ ရည်ရွယ်ချက်နဲ့လုပ်တယ်ဆိုရင်တော့ သူတို့မျှော်မှန်းထားတဲ့ နည်းလမ်း ထဲက နည်းလမ်း ၂ နဲ့ ၃ ပဲကြုံရမယ်။

အဲဒါကိုတော့ ကျနော်တို့က ပွင့်ပွင့်လင်းလင်း အခုကတည်းက ပြောတယ်။ နံပတ် ၃ အချက် ကတော့ အဲဒီ အစ္စလာမစ် ဘာသာရေး အဖွဲ့အစည်း အနေနဲ့ ဒီမောင်တောမှာ ပဋိပက္ခ တွေပိုပြီး ပြင်းထန် လာအောင် ပိုပြီးတော့ အစွန်းရောက်တွေ ပိုနိုးကြားလာအောင် စွဲဆောင် စည်းရုံးတဲ့ သဘော နဲ့ ဘာသာရေးကို ခုတုံးမလုပ်ဖို့။

နံပတ် ၁ ဘာသာရေးကို ခုတုံးမလုပ်ဖို့။ နံပတ် ၂ ဘာသာရေးကို အသုံးမချဖို့ ၊ နံပတ် ၃ ဘာသာရေးအစွန်းေ၇ာက်တွေ တိုးပွားလာအောင်မလုပ်ဖို့ အဲဒါကိုတော့ ကျနော်တို့က
ပြတ်ပြတ် သားသား ပြောချင်တယ်။

ကိုသားညွှန့်ဦး ။ ။အရင်တုန်းကရော အလားတူမျိုး ခွင့်ပြုချက် မရှိပဲနဲ့ အဲဒီလိုမျိုး တခြားနိုင်ငံတွေ မွတ်ဆလင် နိုင်ငံတွေက နေပြီးတော့ အတင်း ၀င်ရောက် တာမျိုးတွေ အကူအညီ ၀င်ပေး တာမျိုးတွေ ရှိခဲ့၊ ဖြစ်ခဲ့ဖူး ပါသလား။

ဦးဇော်ဌေး။ ။ မြန်မာနိုင်ငံသမိုင်းကြောင်းမှာကတော့ အဲဒီဖြစ်စဉ်မျိုး မဖြစ်ခဲ့ဘူး၊ မရှိခဲ့ဘူး ဖြစ်လာလည်း လက်ခံမှာ မဟုတ်ဘူး။

ကိုသားညွှန့်ဦး ။ ။ ဦးဇော်ဌေး ကျေးဇူး အများကြီး တင်ပါတယ်။

မြန်မာသမ္မတရုံးဝန်ကြီးဌာန ပြောခွင့်ရသူ ဦးဇော်ဌေးကို ကိုသားညွန့်ဦး ဆက်သွယ်မေးမြန်း ခဲ့တာဖြစ်ပါတယ်။

ဒီကိစ္စနဲ့ပတ်သက်လို့ မြန်မာနိုင်ငံခြားရေးဌာနကို ဗွီအိုအေက ဆက်သွယ်မေးမြန်းရာမှာ ဒီအဖွဲ့အစည်းအနေနဲ့ တရားဝင် သံတမန်ရေးနည်းအရ မြန်မာအစိုးရကို ဆက်သွယ်
ဆောင်ရွက်ဖို့ ဆိုတာကို မြန်မာ အခြေစိုက် မလေးရှား သံရုံးထံ နိုင်ငံခြားရေး ၀န်ကြီးဌာန အမြဲတမ်း အတွင်းဝင်က စာပေးပို့ ထားတယ်လို့ ပြောခွင့်ရသူ တဦးက ပြောဆိုခဲ့ပါတယ်။



From : ဗွီအိုအေမြန်မာသတင်းဋ္ဌာန By : (သားညွန့်ဦး)

Originally published at - http://burmese.voanews.com

No comments:

smy909@gmail.com