နိုင်ငံတကာနှင့် ပြည်တွင်းသတင်း၊ နည်းပညာ၊ ဆော့ဝဲလ်နှင့် ဗဟုသုတများ

အားပေးကြတဲ့မိတ်ဆွေများ

Friday, April 21, 2017

သံမဏိနှင်းဆီ ဂျာနယ် လူသတ်မှု ပြစ်မှုကျုးလွန် သူကို ရဲတပ်ဖွဲ့ ထုတ်ပြန်




ရန်ကုန်၊ ဧပြီ ၂၁ – ၁၆.၄.၂၀၁၇ ရက်နေ့ နံနက် ၈ နာရီခွဲ အချိန်တွင် ပုဇွန်တောင် မြို့နယ်ရှိ သံမဏိနှင်းဆီ ဂျာနယ် တိုက်မှ အပုတ်နံ့ ထွက်နေကြောင်း ဘေးချင်းကပ် လျက် အခန်း နေသူမှ အယ်ဒီတာ ဖြစ်သူအား အကြောင်းကြား ခဲ့သဖြင့် ဂျာနယ် တိုက်ခန်း အတွင်းသို့ ၀င်ရောက် ကြည့်ရှုရာ အယ်ဒီတာ၏ သားဖြစ်သူ ဝေယံဟိန်းမှာ ဓားဒဏ်ရာ များဖြင့် ပုတ်ပွ သေဆုံး နေကြောင်း တွေ့ရှိရ၍ ပုဇွန်တောင် မြို့မ ရဲစခန်းသို့ အရေး ယူပေးရန် အမှုဖွင့် တိုင်တန်း ခဲ့သော အမှုဖြစ်ပါသည်။

အမှုမှန် အမြန်ဆုံးပေါ်ပေါက်ရေး အတွက် တိုင်းဒေသကြီး ရဲတပ်ဖွဲ့မှူးမှ အထူး အမှုစစ် အဖွဲ့အား ဖွဲ့စည်း ဆောင်ရွက် စေခဲ့ရာ ပြစ်မှု ကျူးလွန်သူ အား ၄ ရက်အတွင်း ဖော်ထုတ် ဖမ်းဆီးနိုင် ခဲ့ကြောင်း သိရသည်။

အမှု အမြန်ဖော်ထုတ်နိုင်ရေး အတွက် စုံစမ်းခဲ့ရာ သေဆုံးသူ ဝေယံဟိန်း မှာလွန်ခဲ့သော ၈ လခန့်က မအယ်နီ (ခ) ရိုစီကို ဆိုသူနှင့် Facebook မှ တစ်ဆင့် ချစ်ကြိုက်ကာ မကြာခဏ ချိန်းတွေ့ ခဲ့ကြကြောင်း၊ မအယ်နီ(ခ) ရိုစီကိုမှာ နိုင်ငံခြား သင်္ဘောသား အောင်ကိုကို၏ ဇနီးဖြစ်ပြီး သားတစ်ဦး ရှိကြောင်း စုံစမ်း သိရှိ ရပါသည်။

နိုင်ငံခြားသင်္ဘောသား အောင်ကိုကိုမှာ ၂၀၁၆ ခုနှစ်၊ အောက်တိုဘာလကုန်တွင် စင်္ကာပူနိုင်ငံမှ ရန်ကုန်မြို့သို့ ပြန်လည်ရောက်ရှိလာစဉ် ၎င်းတို့ မိသားစု နေထိုင်သော မင်္ဂလာ တောင်ညွန့် မြို့နယ်၊ သပြေကုန်း ရပ်ကွက်ရှိ နေအိမ်ရှေ့တွင် ကားတစ်စီး ရပ်ထားသည် ကို၎င်းမှ တွေ့မြင်ခဲ့ပြီး ၎င်းကားမှာ ထွက်ပြေး သွားသဖြင့် ဇနီးဖြစ်သူအား မေးမြန်းရာမှ ဝေယံဟိန်း၏ ကားဖြစ်ကြောင်း သိရသည့် အပြင် နိုင်ငံခြားရှိ သူငယ်ချင်းဖြစ်သူ တစ်ဦးမှလည်း Facebook Account တွင် ၎င်း၏ ဇနီး အား ဝေယံဟိန်းဆိုသူနှင့် ဓာတ်ပုံတွဲရိုက် ထားသည်ကို ပြောပြ ခဲ့ဖူးသဖြင့် ၎င်း၏ ဇနီးနှင့် လူမှုရေး ဖောက်ပြန်နေကြောင်း မသင်္ကာဖြစ်ကာ ဝေယံဟိန်း အား ဖုန်းဖြင့် ဆက်သွယ်၍ စကားများ ခဲ့ဖူးကြောင်း စုံစမ်း သိရသည်။

ပြစ်မှု ကျူးလွန်ရန် မသင်္ကာသည့် အကြောင်း များကြောင့် ရဲတပ်ဖွဲ့ဝင် များက အောင်ကိုကိုအား စုံစမ်းခဲ့ရာ ၁၅.၄.၂၀၁၇ ရက်နေ့ ညနေ ၅ နာရီ အချိန် တွင် ပြင်ဦးလွင် မြို့ရှိ ၎င်း၏ မိဘများ နေထိုင်ရာ ငါးရံ့ချောင်း ရွာသို့ တိမ်းရှောင် ထွက်ပြေး နေကြောင်း စုံစမ်း သိရ သဖြင့် သွားရောက် ဖမ်းဆီး ခဲ့ရာ အောင်ကိုကိုနှင့် ဇနီးဖြစ်သူ မအယ်နီ (ခ) ရိုစီကို တို့အား ၁၉.၄.၂၀၁၇ ရက်နေ့ ညနေ ၆ နာရီအချိန်တွင် ဖမ်းဆီးရမိခဲ့ပါသည်။

အောင်ကိုကို၏ ဖော်ထုတ်ချက် အရ သေဆုံးသူ ဝေယံဟိန်းမှာ ၎င်း၏ ဇနီးဖြစ်သူ မအယ်နီ (ခ) ရိုစီကိုနှင့် လူမှုရေး ဖောက်ပြန် နေကြောင်း သိရ သဖြင့် ၁၁.၄.၂၀၁၇ ရက် နေ့တွင် ဇနီး မအယ်နီ (ခ) ရိုစီကိုနှင့် သားဖြစ်သူ တို့အား နေအိမ် အတွင်း ထား၍ အပြင်မှ သော့ခတ် ထားခဲ့ရာ နေအိမ်သို့ ပြန်လည် ရောက်ရှိစဉ် ဇနီးနှင့် သားဖြစ်သူ တို့မှာ မတွေ့ရှိ ရသဖြင့် ဇနီးဖြစ်သူ အားပြန်လည် တွေ့ရှိနိုင်ရန် အတွက် ၁၂.၄.၂၀၁၇ ရက်နေ့တွင် ဝေယံဟိန်း အား ဖုန်းဖြင့် ဆက်သွယ်ပြီး စုံစမ်းခဲ့သည့် အပြင် ကန်တော်ကြီး ဥယျာဉ်သို့ ချိန်းဆို၍ အကူအညီ တောင်းခံ ခဲ့ကြောင်း၊ ၁၄.၄.၂၀၁၇ ရက်နေ့တွင် ဝေယံဟိန်းမှ အောင်ကိုကိုထံ ဖုန်းဖြင့် ဆက်သွယ်ပြီး ဒဂုံဧရာ အဝေးပြေး ၀င်းတွင် အယ်နီ (ခ) ရိုစီကိုနှင့် သားဖြစ်သူအား တွေ့ရှိခဲ့ကြောင်း၊ အကြောင်းစုံ သိလိုပါက ၎င်းနေထိုင်သည့် သံမဏိနှင်းဆီ ဂျာနယ် တိုက်သို့ လာရောက်ရန် ချိန်းဆို ခဲ့ပါသည်။



ယင်းနေ့ ၁၄၀၀ အချိန်တွင် အောင်ကိုကိုမှ ဂျာနယ်တိုက်သို့ သွားရောက် ခဲ့ရာ သေဆုံးသူ ဝေယံဟိန်း တစ်ဦးတည်း တွေ့ရှိခဲ့ပြီး ၎င်း၏ ဇနီးအား ရှာဖွေပေးရန် ပြောဆို ခဲ့ရာ ဝေယံဟိန်းမှ အောင်ကိုကို၏ ဇနီး အယ်နီ(ခ) ရိုစီကိုမှာ ၎င်းနှင့် တစ်ဦးတည်း လူမှုရေး ဖောက်ပြန် ခဲ့ခြင်း မဟုတ်ဘဲ အခြား အမျိုးသား များနှင့် လည်း ပတ်သက် ခဲ့ဖူးကြောင်း၊ ယခု အယ်နီ(ခ) ရိုစီကိုအား လမ်းမတော် မြို့နယ်ရှိ Bilss Guest House အခန်း (၁၀၁) တွင် ဝေယံဟိန်း အမည်ဖြင့် တည်းခို နေထိုင်စေ ခဲ့ကြောင်း ပြောဆို ခဲ့ရာမှ တစ်ယောက် တစ်ခွန်း စကားများ ခဲ့ပြီး စားပွဲပေါ်ရှိ ဓားဦးချွန်ဖြင့် ဝေယံဟိန်း ၏ ၀မ်းဗိုက်အား ၁၄ ချက် ၁၅ ချက်ခန့် ထိုးနှက် ခဲ့ကြောင်း၊ ဝေယံဟိန်း၏ iPhone SE ကိုလည်း ယူဆောင် လာခဲ့ကြောင်း၊ ဇနီးဖြစ်သူ မအယ်နီ (ခ) ရိုစီကိုနှင့် သားဖြစ်သူ တို့ကိုလည်း ၎င်းနေ့ ၁၈၀၀ အချိန်တွင် Bilss Guest House တည်းခိုခန်းမှ သွားရောက် ခေါ်ယူကာ ရွှေဂုံတိုင် ဟိုတယ်သို့ ပြောင်းရွေ့ တည်းခို ခဲ့ပြီး ၁၅.၄၂၀၁၇ ရက်နေ့ ညနေ ၅ နာရီ အချိန်တွင် ပြင်ဦးလွင် မြို့ရှိ ၎င်း၏ မိဘများ နေထိုင်ရာ ငါးရံ့ချောင်း ရွာသို့ ထွက်ပြေး တိမ်းရှောင် ခဲ့ကြောင်း ပေါ်ပေါက် ခဲ့ပါသည်။

အယ်နီ(ခ) ရိုစီကို အား စစ်ဆေးရာတွင် ၁၁.၄.၂၀၁၇ ရက်နေ့ နံနက် ၉ နာရီ အချိန်ခန့်က ၎င်းတို့မိသားစု နေထိုင်သော မင်္ဂလာတောင်ညွန့် မြို့နယ်ရှိ နေအိမ်တွင် ခင်ပွန်းဖြစ်သူ အောင်ကိုကိုမှ ၎င်းတို့ သားအမိအား အပြင်မှ သော့ခတ် ထားစဉ် ၎င်းနှင့် ချစ်ကြိုက်နေသူ ဝေယံဟိန်းအား ဖုန်းဖြင့် ဆက်သွယ် ခေါ်ယူခဲ့သဖြင့် ဝေယံဟိန်းနှင့် သော့ပြင်သူ တစ်ဦးတို့မှ ည ၈ နာရီအချိန်တွင် ရောက်ရှိ လာကြောင်း၊ နေအိမ် တံခါးသော့အား ဖျက်ကာ ၎င်းတို့ သားအမိ အား ခေါ်ဆောင်၍ လမ်းမတော် မြို့နယ်ရှိ Bilss Guest House သို့ ည ၉ နာရီ အချိန် ခန့်တွင် ရောက်ခဲ့ပြီး အခန်း အမှတ် (၁၀၁) တွင် တည်းခို နေထိုင်စေခဲ့ကြောင်း၊ တည်းခိုနေထိုင်စဉ် ၁၂.၄.၂၀၁၇ ရက်နေ့ နေ့လယ် ၂ နာရီ အချိန်ခန့်တွင် ဝေယံဟိန်းမှ ထမင်းချိုင့် ပို့ပေးခဲ့ကြောင်း၊ သားဖြစ်သူအား ဂိမ်းကစားရန် ဝေယံဟိန်းမှ ၎င်း၏ လက်တော့အား ပေးခဲ့ကြောင်းနှင့် ၁၁ ရက်နေ့မှ ၁၄ ရက်နေ့ ညနေပိုင်း အထိ တည်းခိုခဲ့ကြောင်း ပေါ်ပေါက် ခဲ့ပါသည်။

အခင်းဖြစ်စဉ်က ပြစ်မှုကျူးလွန်သူ အောင်ကိုကိုဝတ်ဆင်ခဲ့သည့် ဂျင်းဘောင်းဘီနှင့် တီရှပ်တို့အား မင်္ဂလာတောင်ညွန့်မြို့နယ်၊ သပြေကုန်း ရပ်ကွက်၊ (၁၂၅) လမ်းရှိ နေအိမ်မှ သိမ်းဆည်း ရမိခဲ့ပြီး အမှုနှင့် သက်ဆိုင် သည့် သက်သေခံ ပစ္စည်းများဖြစ်သည့် လက်တော့နှင့် iPhone SE တို့အားအောင်ကိုကိုမှ ဇနီးဖြစ်သူနှင့် ပြင်ဦးလွင်သို့ သွားရောက်စဉ် Feel စားသောက်ဆိုင် အနီးရှိ ရေကန် အတွင်းသို့ လွှင့်ပစ် ခဲ့ကြောင်းနှင့် အခင်းဖြစ်စဉ် အသုံးပြုသည့်ဓားကိုလည်း ဂျာနယ် စက္ကူဖြင့်ထုပ်ပိုးပြီး ဂျာနယ်တိုက် မျက်စောင်းထိုးရှိ အမှိုက်ပုံးတွင် လွင့်ပစ် ထားခဲ့ကြောင်း သိရှိရ သဖြင့် သက်သေခံ ပစ္စည်းများ သိမ်းဆည်း ရမိရေး အတွက် ဆက်လက် ရှာဖွေဆောင်ရွက်လျက် ရှိပါသည်။

(Yangon police ထုတ်ပြန်ချက်)

From : ကုမုဒြာဂျာနယ်

Originally published at - http://www.kumudranews.com


No comments:

smy909@gmail.com